महोत्तरी पिपरा गाउँपालिका–५ सहोडवाका बेपत्ता झा दम्पतीको अवस्था अझै अज्ञात - Hamro Janakpur

महोत्तरी — पिपराका एक दम्पतीलाई बेपत्ता पारेको आरोपमा ४ जना पक्राउ परे । तर दम्पतीको अवस्था अझै अज्ञात छ । आरोपितको फरक–फरक बयानका कारण पत्ता लाग्न नसकेको प्रहरीले जनाएको छ ।

फागुन १० को राति ६५ वर्षीय मुसफिर झा र उनकी श्रीमती ६० वर्षकी गीतादेवी झा घरबाटै बेपत्ता पारिएका हुन् । घटनामा संलग्नताको आरोपमा प्रहरीले आइतबार पिपरा गाउँपालिका–५ सहोडवाका रामबाबु यादव, उनका जेठा छोरा सुरेन्द्र यादव, कान्छा राजेन्द्र यादव र भारतको मधुवनी घर भई पिपरा–६ बनौली बस्ने हरेन्द्र ठाकुरलाई सार्वजनिक गरेको थियो ।

महोत्तरी प्रहरीका एसपी दिनेश आचार्यले घटनामा संलग्न देखिएपछि पक्राउ परेका अभियुक्तबाट प्रस्ट बयान नआएका कारण झा दम्पतीलाई फेला पार्न नसकिएको बताए ।

आचार्यका अनुसार भारतसहित महोत्तरीका शंकास्पद ठाउँमा उनीहरूको खोजी भइरहेको छ । पक्राउ परेका भारतीय नागरिक हरेन्द्र जग्गा कारोबारी भएको प्रहरीले जनाएको छ । उनको सहोडवामा प्लटिङ गरेको १३ बिघा जग्गाको उत्तरतर्फ झाको १४ कट्ठा जग्गा छ ।

आफ्नो जग्गामा बाटो पुर्‍याउन उनले झालाई जग्गा बेच्न दबाब दिँदै आएका थिए । झा जग्गा बेच्न सहमत थिएनन् । हरेन्द्रले बाटो हुँदा आफ्नो जग्गा घडेरीको मूल्यमा बिक्री हुने भन्दै झालाई बोलाउने र दबाब दिने गरेका थिए । रामबाबु यादवको माध्यमबाट हरेन्द्रले प्लटिङको जग्गा किनेको र उनीहरू साझेदार रहेकाले यादवले समेत झा दम्पतीलाई दबाब दिँदै आएको प्रहरीले बताएको छ ।

कान्तिपुर राष्ट्रिय दैनिक बाट

प्रतिक्रिया

सम्बन्धित खवर

ताजा समाचार

लोकप्रिय

error: अरुको सामग्री चोरन पाईदैन ।